【高層同小職員食Lunch可以增進感情？】
時間12:53，距離食Lunch仲有7分鐘，同事們正在整裝待發。突然Meeting room房門打開，率先行出嚟嘅係GM。
「今日我哋同大家食lunch，你哋諗吓想食啲咩喇！」
公司大粒話一齊食Lunch，最開心嘅應該得新入職嘅同事。因為岩岩入職人工唔高，有人請絕對歡迎之至，佢哋亦好Pure好True以為去食餐飯就算。
另一邊箱，有人歡喜有人愁，帶咗愛心飯盒(隔夜飯)嘅新手爸爸、諗住鼠去腦場買Game嘅IT仔、打算食個頹飯再恰15分鐘嘅中年Sales佬、唔識睇高層眉頭眼額嘅港女，聽到高層召喚後猶如晴天霹靂，頓時感到天轉地旋。
有人話，喺公司咁壓迫嘅地方，同事好難暢所欲言。所以高層希望趁食個飯，等同事放鬆心情之下，咁咪有嗰句講果句，同時又可以聯繫上下之間關係。
GM再補多句「哈哈！大家放鬆少少，只係食個普通飯。」
話就話食個普通Lunch，但根據過往經驗，由成排人行去餐廳嘅隊形，再入到餐廳後嘅坐法，然後到叫嘢食嘅Order，行每步、答每句、笑每下都危機四伏。老細未開口食，大家唔敢食第一啖；老細問水準如何，大家未吞都搶住話好食。試問喺咁嘅環境，小職員又如何放鬆食飯呢？
其實Lunch Time除咗食飯，更重要係俾職員們唞吓氣同增進感情。正所謂「有共同敵人，大家就係自己人」，食飯時呻下做嘢辛苦，彈下老細點離地法，八下邊個同邊個感情事，打探有無搵錢好路數，圍爐嬉笑怒罵一小時，實際作用好似無乜，但圍完爐取暖，又真係好似叉足電，下晝返工都有氣有力啲。
如果公司環境令同事好難暢所欲言，呢個係高層要去解決嘅問題，例如改善同事開會嘅投入程度、政策嘅決定方式等等，而唔係走去懲罰小職員，喺食晏仔嘅時候都要滲透講公事。Fine，就算真係想同小職員交流公事，亦可以嘗試輪流一對一食Lunch。否則喺所有人出席嘅飯局，你都幾難聽得到有咩驚世真心話了。
「依家堂食二人限聚令喎！」遠處忽然傳來一把Intern妹妹聲音。
Search